: تازہ ترین

تازہ ترین ویڈیو

کسی بھی قوم کی ترقی میں کتب خانوں کی اہمیت مسلمہ ہے، مرزا مقصود احمد بیگ


Nafis-Pic February 23, 2020 | 7:48 PM

لائبریاں قوم کی تہذیبی روایات و نظریات کا ترجمان ہوتی ہیں، انجینئر وسیم احمد فاروقی
سوشل اسٹوڈنٹس فورم اور نیشنل لائبریری ایسوسی ایشن کے زیر اہتمام گورنمنٹ گرلز کالج بلاک ایم میں لائبریری ڈے پر سیمینار کا انعقاد
کراچی: (نیوزآن لائن) کسی بھی قوم کی ترقی و کامیابی میں کتب خانوں کی اہمیت مسلمہ ہے۔ یہ بات لائبریری ڈے کے سلسلے میں سوشل اسٹوڈنٹس فورم اور نیشنل لائبریری ایسوسی ایشن کے زیر اہتمام اور گورنمنٹ گرلز کالج بلا ک ایم کے تعاون سے منعقدہ سیمینار بعنوان ”طلباء میں لائبریری کی اہمیت” سے بحیثیت مہمانِ خصوصی خطاب کرتے ہوئے مرزا مقصود احمد بیگ نے کہی۔ انہوں نے کہا کہ لائبریری کے ذریعے علوم کا ایک نہ ختم ہونے والا سلسلہ انسانی رہنمائی کا ذریعہ بنتا ہے اور قوم کی ترقی میں لائبریری کی اہمیت سے انکار ناممکن ہے۔ تقریب کے صدر انجینئر وسیم احمد فاروقی نے کہا کہ لائبریریاں قوم کی تہذیبی روایات و نظریات کا ترجمان ہوتی ہیں۔ تاریخ، جغرافیہ سے آگاہی حال سے مطابقت اور مستقبل کے بہترین فیصلوں میں رہنمائی کے حوالے سے نئے کتب خانے اہم سنگ میل ثابت ہوتے ہیں۔ قبل ازیں فورم کے چیئرمین نفیس احمد خان نے خطبۂ استقبالیہ پیش کرتے ہوئے کہا کہ ہم الحمدللہ تقریباً 16 سال سے لائبریری ڈے منارہے ہیں تاکہ ہمارے طلباء میں اور دیگر افراد میں کتاب سے لگائو بڑھے اور اپنی زندگی میں انقلاب لاسکیں کیونکہ کتاب زندگی ہے، روشنی ہے اور آگے بڑھنے کا راستہ ہے۔ کالج کی پرنسپل محترمہ عابدہ سلطانہ نے تمام مہمانوں کا شکریہ ادا کیا۔ جبکہ دیگر کالجوں کی طالبات نے خوبصورت تقاریر کے ذریعے لائبریری کی اہمیت پر زور دیا۔ دیگر مقررین میں زاہد حسین زاہد، غلام علی عسکری، ڈاکٹر ناصر حسین (ناساکا) نے خصوصی طور پر طلباء سے خطاب کیا۔ فورم کے ایڈیشنل سیکریٹری قیصر جمال، نیشنل لائبریری ایسوسی ایشن کے سیکریٹری انور حسین، صدر مظفر علی شاہ، ڈاکٹر ندیم صدیقی، نے بھی خطاب کیا۔ جبکہ منصفین فہیم برنی اور پروفیسر نادیہ خاتون کے مطابق اوّل عروبہ شاہد، دوئم ارم باری اور سوئم اشفاء شفیق آئیں۔ جبکہ میزبانی عالیہ مجید اور قدسیہ ناز نے خوبصورت انداز میں انجام دی۔