: تازہ ترین

تازہ ترین ویڈیو

پاکستان پیپلز پارٹی کراچی ڈویژن کا گیس کی عدم فراہمی پر شدید برہمی کااظہار


PPP-FLAG December 30, 2018 | 6:51 PM

کراچی: (نیوزآن لائن) پاکستان پیپلز پارٹی کراچی ڈویژن کے جنرل سیکریٹری جاوید ناگوری، نائب صدر سردار خان ، ڈپٹی سیکریٹری اطلاعات شکیل چوہدری اور ضلع شرقی کے صدر اقبال ساند نے اپنے مشترکہ بیان میں گیس کی عدم فراہمی پر شدید برہمی کااظہار کیا۔ انہوںنے کہا کہ تبدیلی اور ترقی کی واضح مثال صرف صوبہ سندھ اور خاص کر کراچی میں دیکھی جاسکتی ہے۔ پی ٹی آئی کی ناقص حکمت عملی کے سبب کبھی سی این جی اسٹیشن پر گیس نہیں ہوتی تو کبھی عوام کو کھانے پکانے کے لئے گھریلو گیس فراہم نہیں کی جاتی ۔ انہوں نے کہا کہ یہ انتقامی کارروائی صرف سندھ کے ساتھ ہونا زیادتی ہے ، گیس کے غائب ہوجانے کے سبب گھریلوں صارفین شدید پریشانی میں مبتلا ہے ۔ انہوں نے کہا کہ گیس پہلے صرف صبح کے اوقات میں کم ہوجاتی تھی اب تو چولہے کو آگ دیکھانے کے باوجود پریشر نہیں آرہا ہے اور رات کے وقت بھی گیس کی فراہمی نہیں کی جارہی ۔ انہوں نے کہا کہ پی ٹی آئی کو عوام پر مسلط کر ہی دیا گیا ہے تو اپوزیشن کے ساتھ انتقامی کارروائیوں اور بیان بازیوں کے ساتھ ساتھ عوام کو ریلیف پہچانے کی ذمہ داری بھی پوری کریں اور سوئی سدرن گیس کمپنی کا قبلہ درست کروائیں۔ انہوں نے کہا کہ پی ٹی آئی حکومت اقتدار کے نشہ میں غریب عوام کا چولہا ٹھنڈے کرنے پر تلی ہوئی ہے اور ملک سے غربت مٹانے کے بجائے غریب کو ختم کرنے کی پالیسی پر گامزن ہے۔