: تازہ ترین

تازہ ترین ویڈیو

پاکستان پیپلز پارٹی انسانی حقوق ونگ لاہور کے زیراہتمام سمیرا گل کی کتاب ”ہمارے رہنما” کی تقریب منعقد


PPP flag 02 February 2, 2015 | 7:43 PM

لاہور (نیوزآن لائن) پاکستان پیپلز پارٹی انسانی حقوق ونگ لاہور کے زیراہتمام پیپلز پارٹی راولپنڈی کی جنرل سیکرٹری محترمہ سمیرا گل کی کتاب ”ہمارے رہنما” کی تقریب رونمائی پریس کلب لاہور میں منعقد ہوئی۔ تقریب کی مہمان خصوصی ڈپٹی سپیکر آزاد کشمیر اسمبلی محترمہ شاہین کوثر ڈار تھی۔ تقریب سے خطاب کرتے ہوئے محترمہ شاہین کوثر ڈار، آصف خان، محترمہ سمیرا گل، سہیل ملک، نصیر احمد، عمر حیات تبسم، خاور محمود کٹھانہ، فوزیہ چغتائی، غلام محی الدین دیوان، خالد بٹ نے خطاب کرتے ہوئے کہا کہ پیپلز پارٹی ایک فکر اور سوچ کا نام ہے۔ پیپلز پارٹی کے کارکنوں نے ہمیشہ امن اور جمہوریت کا درس دیا ہے۔ محترمہ بے نظیر بھٹو شہید نے بھی ڈکٹیٹروں سے بدلہ لینے کی بجائے جمہوریت بہترین انتقام کا نعرہ لگایا تھا اور پیپلز پارٹی نے ہمیشہ اپنے منشور کو سوچ، فکر اور سٹڈی سرکل کے ذریعے آگے بڑھایا ہے۔ محترمہ سمیرا گل نے اپنی کتاب میں ان گمنام اور جدوجہد کرنے والے سیاسی کارکنوں کا تذکرہ کیا ہے جنہوں نے اس ملک میں جمہوریت کی بحالی اور انسانی حقوق کے لیے نہ صرف جدوجہد کی ہے بلکہ قیدوبند کی صعوبتوں کے ساتھ ساتھ جانوں کے نذرانے بھی پیش کیے ہیں۔ سیاسی کارکنوں کے ساتھ ساتھ محترمہ سمیرا گل نے ان سماجی کارکنوں کا بھی تذکرہ کیا ہے جنہوں نے سماجی رویوں میں تبدیلی کے لئے انتھک کوششیں کی ہیں اور ان کی کوششوں سے عوام کا شعور بلند ہوا ہے۔ محترمہ سمیرا گل نے اپنی کتاب میں ان کارکنوں کا تذکرہ کر کے ان کی جدوجہد کو امر کر دیا ہے اور ثابت کیا ہے کہ کارکن ہی کسی بھی جماعت کی ریڑھ کی ہڈی ہوتے ہیں اور کارکنوں کی جدوجہد کی بدولت ملک میں جمہوری کلچر پروان چڑھتا ہے اور آج اس امر کی اشد ضرورت ہے کہ کارکنوں کی قربانیوں کو تسلیم کیا جائے اور اقتدار ملنے پر جمہوریت کے ثمرات ان تک بھی پہنچنے چاہئیں۔ تقریب میں شرکاء نے محترمہ سمیرا گل کی اس کاوش کو سراہا کہ انہوں نے کتاب لکھ کر ثابت کیا ہے کہ کارکن ہی پارٹی کا سرمایہ ہوتے ہیں اور پارٹی میں کارکنوں کی قربانیوں کو یاد رکھنا ضروری ہے اور جو پارٹی کارکنوں کو بھول جاتی ہے وہ پارٹی سماج میں زندہ نہیں رہ سکتی۔