: تازہ ترین

تازہ ترین ویڈیو

لائنز کلب انٹرنیشنل کے تعاون سے پنجاب میں پینے کے صاف پانی کی فراہمی کیلئے اقدامات کئے جائیں گے۔شیخ محمد ابراہیم


bahalpur news April 6, 2015 | 5:48 PM

بہاول پور (نیوزآن لائن)لائنز کلب انٹرنیشنل کے تعاون سے پنجاب میں پینے کے صاف پانی کی فراہمی کے لئے اقدامات کئے جائیں گے۔مخیر خواتین و حضرات زیادہ سے زیادہ لائنز کلب کی رکنیت اختیا ر کریں تاکہ پاکستان کے لوگ بھی عالمی سطح پر غیر سیاسی اور غیر ریاستی سرگرمیوں میں اپنا بھر پور کردار ادا کر کے ثابت کر سکیں کہ انہیں انسانیت کی فلاح و بہبود اور تعمیروترقی سے کس قدر دلچسپی ہے۔ ان خیالات کا اظہار لائنز ڈسٹرکٹ گورنر شیخ محمد ابراہیم نے بہاول پور چولستان لائنز کلب کے تحت منعقدہ تقریب سے خطاب کرتے ہو ئے کیا ۔ انہوں نے مزید کہا کہ بہاول پو رچولستان لائنز کلب کی صحت کے شعبے میں خدمات کو عالمی سطح پر سراہا جا رہا ہے۔ ان خدمات کا دائرہ کا ر وسیع کر نے کے لئے جلد فری آئی کیمپس کا انعقاد کرنے کے علاوہ سرجری اور تعلیم کے شعبوں میں خدمات کو توسیع دی جائے گی۔اپنے دورہ بہاول پور کے دوران اہل بہاول پور کی طرف سے ملنے والی محبت بھری پذیرائی زندگی بھر یاد رکھوں گا۔ اس موقع پر بہاول پور چولستان لائنز کلب کے جنرل سیکرٹری فاروق احمد خان نے اظہار خیال کرتے ہوئے کہا کہ لائنز کلب کے تحت دنیا بھر کی طرح بہاول پور میں بھی بلا کسی امتیاز ،رنگ و نسل ،مذہب و ملک ،علاقہ صرف اور صرف انسانیت کی خدمت کے جذبہ سے سرشار ہو کر کام کیا جا رہا ہے۔خاص طور پر صحت و تعلیم کے شعبوں میں حتی المقدور معاونت کی جارہی ہے۔ بہت جلد ضلعی انتظا میہ اور محکمہ صحت کے تعاون سے مختلف علاقوں میں فری آئی کیمپس لگائے جائیں گے۔جہاں آنکھوں کے آپریشن ، لینز کی تبدیلی، ادویات کی فراہمی اور آگاہی دی جائے گی۔لائنز ڈاکٹر جاوید اقبال نے مہمانوں کی آمد پر اظہار تشکر کرتے ہوئے کہا کہ بہاول پور چولستان لائنز کلب کے عہدیداران اور ارکان اپنے کلب کو فعال کرنے کے لئے رکنیت سازی اور تربیت پر بھر پور توجہ دینے کا عہد کرتے ہیں ۔تقریب کی نقابت کے فر ائض سر انجام دیتے ہوئے لائنز ڈاکٹر منیر اظہر چوہدری اور محترمہ رضیہ ملک نے کہا کہ بہاول پور چولستان لائنز کلب کے تحت عام لوگوں کے سا تھ ساتھ خواتین اور بچوں کے مسائل کے حل کو فوکس کیا جا رہا ہے۔ تقریب میں لائنز کلب سے تعلق رکھنے والے زونل چئیرمین عبد المحسن شاہین،کیبنٹ سیکرٹری شفیع اللہ خان ،بہاول پور چولستان لائنز کلب کے چئیرمین ڈاکٹر طارق رانا ، آفتاب جدران ، عبدالحمید بلوچ، حبیب اللہ بھٹہ ،مسز حبیب اللہ بھٹہ ، پروفیسر ڈاکٹر محمد اصغر ہاشمی، مختار احمد فارانی ایڈووکیٹ، سید تنصیر الحسن ترمذی، وکلاء خواتین اور طلباء و طالبات نے شرکت کی۔لائنز ڈسٹرکٹ گورنر شیخ محمد ابراہیم نے لائنز کلب کے ارکان کو لائنز بیج لگائے اور سید عبداللہ تنصیر کو لائنز پیس ایوارڈ پیش کیا ۔اس کے علاوہ نو جوانوں پر مشتمل بہاول پور چولستان لیو کلب کے صدر تیمور خان اور جنرل سیکرٹری اویس بخاری سمیت دیگر عہدیداروں سے حلف لیا گیا ۔بعد ازاں مہمانوں کو اجرک اور پھول پیش کئے گئے ۔یاد رہے کہ لائنز کلب انٹرنیشنل دو سو گیارہ ممالک میں شاخیں ہیں جس کے ارکان دنیا بھر میں اپنے وسائل کے ساتھ فلاحی کاموں میں مصروف ہیں