: تازہ ترین

تازہ ترین ویڈیو

سید ناصر حسین شاہ اور صوبائی وزیر تعلیم و محنت سعید غنی کا اتوار کے روز مختلف مکاتب فکر کے علماء کرام سے ملاقات


nasir shah and saeed gani March 15, 2020 | 7:30 PM

کراچی: (نیوزآن لائن) سندھ کے وزیر برائے اطلاعات ، بلدیات، جنگلات و جنگلی حیات سید ناصر حسین شاہ اور صوبائی وزیر تعلیم و محنت سعید غنی نے اتوار کے روز مختلف مکاتب فکر کے علماء کرام سے ملاقات کی۔اور ان کو سندھ حکومت کی جانب سے کرونا وائرس کے حوالے سے اٹھائے جانے والے اقدامات اور کئے گئے فیصلوں سے تفصیلاََ آگاہ کیا۔جن علماء کرام سے سید ناصر حسین اور سعید غنی نے ملاقات کی ان میں معروف عالم دین مفتی منیب الرحمان، مولانا بشیر فاروقی اور دعوت اسلامی کراچی کی رابطہ مجلس کے اراکین شامل تھے۔مفتی منیب الرحمان سے دارالعلوم نعیمیہ میں ہونے والی ملاقات کے دوران سندھ کے وزیر اطلاعات سید ناصر حسین شاہ نے کہا کہ سندھ حکومت صوبے میں کرونا وائرس سے بچاؤ کے لئے تمام اقدامات بروئے کار لا رہی ہے۔انہوں نے اس سلسلے میں وزیراعلیٰ سندھ کی جانب سے لئے جانے والے فیصلوں سے مفتی منیب الرحمان کو تفصیلاََ آگاہ کیا۔اس موقع پر گفتگو کرتے ہوئے سندھ کے وزیر تعلیم نے کہا کہ وزیر اعلیٰ کی قائم کردہ ٹاسک فورس سے فیصلوں کے نتیجے میں صوبے کے تمام تعلیمی ادارے بند کردیئے گئے ہیں۔سعید غنی نے کہا کہ مدارس کیلئے بھی یہی احکامات ہیں۔ مفتی منیب الرحمان نے اس موقع پر گفتگو کرتے ہوئے نہ صرف سندھ حکومت کے فیصلوں کی تائید کی بلکہ صوبائی وزراء کو اپنے مکمل تعاون کی یقین دہانی بھی کروائی ۔انہوں نے بتایا کہ سندھ حکومت کے فیصلے کے مطابق تمام مدارس میں درس و تدریس معطل کردی گئی ہے۔مفتی منیب الرحمان نے دعا کی کہ سندھ حکومت کی کوشش کامیاب ہوں اور نہ صرف صوبہ سندھ بلکہ پورا ملک اس وبا سے محفوظ رہے۔دعوت اسلامی کے مجلس رابطہ کے اراکین سے گفتگو کرتے ہوئے سید ناصر حسین شاہ اور سعید غنی نے کہا کہ وہ چاہتے ہیں کہ مولانا الیاس قادری صاحب ایک ویڈیو بیان جاری کریں جس میں عوام کو حکومت سندھ کی جانب سے جاری کردہ ہیلتھ ایڈوائزری سے متعلق آگاہی دیں۔مجلس رابطہ دعوت اسلامی کے اراکین نے اس سلسلے میں اپنے تعاون کا یقین دلاتے ہوئے کہا کہ جلد ہی اس سلسلے میں مولانا الیا س قادری کا بیان جاری کردیا جائے گا ۔ انہوں نے کہا کہ وہ سندھ حکومت کے تمام اقدامات کی مکمل حمایت کرتے ہیں۔صوبائی وزراء نے سیلانی ویلفیئر کے سربراہ مولانا بشیر فاروقی نے بھی ان کے مرکزی دفتر میں ملاقات کی اور انہیں کرونا وائرس پر قابو پانے کے حوالے سے لئے جانے والے حکومتی اقدامات سے آگاہ کیا۔اس موقع پر گفتگو کرتے ہوئے سید ناصر حسین شاہ نے کہا کہ سندھ حکومت چاہتی ہے کہ زندگی کے تمام شعبوں سے تعلق رکھنے والے لوگ مشکل کی اس گھڑی میں حکومت کا ساتھ دیں تاکہ اس وبا سے نجات حاصل کی جا سکے۔مولانا بشیر فاروقی نے اس موقع پر گفتگو کرتے ہوئے کہا کہ جس طرح پہلے دن سے سندھ حکومت نے کرونا وائرس کے پھیلاؤ کو روکنے کے لئے اقدامات کئے ہیں وہ قابل ستائش ہیں۔انہوں نے بتایا کہ سیلانی ویلفیئر نے بھی سندھ حکومت کے اقدامات کے تحت اپنے تمام مراکز پر حکومت کی جاری کردہ صحت کی اصلاحات جاری کردی ہیں۔مولانا بشیر نے کہا کہ وہ حکومت سندھ کا ہر ممکن ساتھ دیں گے تاکہ اس وباء سے جلد نجات کو ممکن بنایا جا سکے ۔ صوبائی وزراء نے ان کے کردار کو سراہتے ہوئے ان کے تعاون پر ان کا شکریہ ادا کیا۔