: تازہ ترین

تازہ ترین ویڈیو

خصوصی افراد کے کوٹے پر عملدرآمد نہ ہونے پر خصوصی نوجوان کے اقدام خودکشی کے واقعہ پر وزیر اعلی سندھ کے معاون خصوصی کا نوٹس


qasim naveed qamar February 16, 2020 | 7:58 PM

کراچی:(نیوزآن لائن) وزیر اعلی سندھ کے معاون خصوصی برائے محکمہ بحالی خصوصی افراد سندھ سید قاسم نوید قمر نے میرپور خاص میں خصوصی افراد کے کوٹے پر عملدرآمد نہ ہونے پر نوجوان 28 سالہ معروف کے اقدام خودکشی کی خبر کا نوٹس لیتے ہوئے ڈپٹی کمشنر میرپور خاص سے رپورٹ طلب کرتے ہوئے ایم ایس سول ہسپتال میرپور خاص کو زخمی نوجوان کے مکمل علاج معالجے کی بھی ہدایت کی ہے۔ اتوار کو جاری ہونے والے ایک بیان میں وزیر اعلی سندھ کے معاون خصوصی برائے محکمہ بحالی خصوصی افراد سندھ سید قاسم نوید قمر نے خصوصی افراد کو یقین دلایا کہ ان کے سرکاری اور نجی شعبوں میں ملازمتوں کے پانچ فیصد کوٹے پر سختی سے عمل کیا جارہا ہے اور کسی کو کوئی شکایت ہے تو متعلقہ محکمے کو فوری طور پر آگاہ کریں۔ انہوں نے مزید کہا کہ سندھ وہ واحد صوبہ ہے جس نے خصوصی افراد کی ملازمت کا کوٹہ دو فیصد سے بڑھا کر پانچ فیصد کردیا ہے اور اس پر سختی سے عمل بھی کیا جارہا ہے۔ سید قاسم نوید قمر نے کہا کہ خصوصی افراد کے حقوق کے تحفظ کے لئے جلد اسمارٹ کارڈ متعارف کروایا جائے گا جس میں نہ صرف متعلقہ شخص کی تمام تفصیلات موجود ہوں گی بلکہ مجوزہ کارڈ کے ذریعے مخصوص سہولیات بھی حاصل کی جاسکیں گی۔ انہوں نے کہا کہ خصوصی افراد سندھ حکومت پر بھروسہ رکھیں۔ ان کے حقوق کا ہر سطح پر تحفظ کیا جائے گا اور ان کی حق تلفی کرنے والوں کے ساتھ قانون کے مطابق نمٹا جائے گا۔