: تازہ ترین

تازہ ترین ویڈیو

اربوں روپے کے ٹیکس ادا کرنے والے تاجروں کی حفاظت کو یقینی بنایا جائے۔مولانا فضل الرحمن


jui September 30, 2013 | 10:20 PM

شیخ منظر عالم پر حملہ بزدلانہ فعل ہے۔ مولانا عبد الغفور حیدری،سینیٹر حاجی غلام علی، ڈاکٹر خالد سومروودیگر کا مشترکہ بیان
کراچی(نیوزآن لائن) جمعیت علماء اسلام پاکستان کے مرکزی امیر مولانا فضل الرحمن، مرکزی سیکرٹری جنرل سینیٹر مولانا عبد الغفور حیدری، سابق صدر ایف پی سی سی آئی سینیٹر حاجی غلام علی، سندھ کے صوبائی سیکرٹری جنرل سابق سینیٹر ڈاکٹر خالد محمود سومرو اور سیکرٹری اطلاعات محمد اسلم غوری نے اپنے ایک مشترکہ اخباری بیان میں فیڈریشن آف پاکستان چیمبرز آف کامرس اینڈ انڈسٹری کے مجلس قائمہ امور برائے پریس اینڈ میڈیا کے چیئر مین کاٹی کے سابق چیئر مین شیخ منظر عالم پر حملے کی شد ید مذمت کرتے ہوئے کہا کہ کراچی میں آپریشن کے باوجود،ڈاکٹرز، پروفیسرز، وکلا ء، پولیس افیسران اور تاجروں سمیت کوئی بھی محفوظ نہیں ہے لگتا ہے کہ پولیس اور رینجرز کو وہ اختیارات نہیں دیئے گئے۔ جن کی باز گشت پچھلے دنوں سنی جا رہی تھی۔اور یہ ادارے اب بھی آزادی سے اپنا کام نہیں کر رہے ہیں کراچی کے حالات میں بہتری عارضی نظر آرہی ہے۔معیشت کسی بھی ملک کی ریڑھ کی ہڈی ہوتی ہے۔ اور اگر اس شعبے کو نقصان پہنچایا جائے تو پھر اس ملک کا کیا انجام ہو گا۔ اُنہوں نے کہا کہ کراچی سے تاجروں کی بیرون ملک روانگی اور انڈسٹریز کی منتقلی اسی سلسلے کی کڑی ہے اس ملک کو اربوں روپے ٹیکس ادا کرنے والے لوگوں کو اگر ہم حفاظت کا احساس نہ دلا سکے تو پھر اس ملک کی بہت بڑی بد قسمتی ہو گی۔
اُنہوں نے کہا کہ فیڈریشن آف چیمبرزآف کامرس اینڈ انڈسٹری پوری دنیا میں پاکستانی تاجروں کی پہچان ہے۔ اور اگر اس کے کسی بھی رہنما کو خدا نخواستہ نقصان پہنچا تو پھر پوری دُنیا میں پاکستانی قوم کی رُسوائی میں اضافہ ہوگا۔ اُنہوں نے سندھ حکومت سے کہا کہ وہ تاجروں کی حفاظت کا خصوصی بندوبست کرے اور انہیں سیکورٹی فراہم کرے۔اُنہوں نے آخر میں شیخ منظر عالم پر حملے کی مذمت کرتے ہوئے اُسے بزدلانہ فعل قرار دیتے ہوئے اُن کی صحت یابی کیلئے خصوصی دُعا کی اور کہا کہ شیخ منظر عالم کی سیکورٹی بڑھانے کے علاوہ ملزمان کو فی الفور گرفتار کرکے قرار واقعی سزا دیجائے۔