: تازہ ترین

تازہ ترین ویڈیو

اب وقت آگیا ہے کہ تمام ریٹائرڈ ملازمین ہر قسم کی سیاست سے بالا تر ہو کر صرف اپنے واجبات کی وصولی کے لئے متحد ہو جائیں، مرزا مقصود


3 December 9, 2019 | 2:48 AM

کراچی:(نیوزآن لائن)مزدور رہنماجناب مرزا مقصودنے ریٹائرڈ ملازمین سے خطاب کرتے ہوئے کہا کہ اب وقت آگیا ہے کہ تمام ریٹائرڈ ملازمین ہر قسم کی سیاست سے بالا تر ہو کر صرف اپنے واجبات کی وصولی کے لئے متحد ہو جائیں، وہ پاکستان اسٹیل کے ریٹائرڈ ملازمین کے وسیع تر مشاورتی اجلاس سے خطاب کر رہے تھے، انہوں نے مزید کہا کہ اس وقت تقریباً 5600 ریٹائرڈ ملازمین اپنے واجبات کے منتظر ہیںجس میں سے تقریباً 1000 ملازمین وفات پا چکے ہیں،ان لوگوں نے عدالتوں میں بھی جا کر دیکھ لیا لیکن اس کے باوجود وہ 2013 سے اب تک اپنے واجبات سے محروم ہیں، انہوں نے کہا کہ حکومت نے فنانشل ایڈوائزر کا تقرر کر دیا ہے جو تین مہینے میں اپنی رپورٹ حکومت کو پیش کر دے گا۔ جس کے بعد پاکستان اسٹیل کو پرائیوٹ یا پبلک پرائیوٹ پارٹنر شپ نیلامی کے لئے پیش کر دیا جائے گا۔اسکے بعد ملازمین کے واجبات کا کیا ہو گا۔ملازمین کس در پر اپنے واجبات تلاش کریں گے، اس لئے یہ ہی وقت ہے کہ متحد ہو کر باہر نکلیں اور اپنے واجبات کی وصولی کے لئے ہر قسم کی پر امن احتجاجی تحریک کے لئے تیار ہو جائیں، اور اس سلسلے میں تین مہینے کا ٹارگیٹ طے کریں۔اس اجلاس میں نظامت کے فرائض جناب خالد خورشید نے انجام دئیے، دیگر خطاب کرنے والے قائدین میں جناب نذیر جان صاحب، جناب وحید صاحب شامل تھے، اجلاس میں ریٹائرڈ ملازمین کی دیگر تنظیموں کے قائدین نے بھی شرکت کی، جن میں پاکستان اسٹیل ریٹائرڈ مظلوم ملازمین ایکشن کمیٹی کے رہنما جناب رائو زلفقار صاحب نے اجلاس سے خطاب کیا، اسکے علاوہ ریٹائرڈ ملازمین کی طرف سے میاں اصغر، نمیر اعظم، منیر احمد، عبدالصمد، عبدالرزاق،محمد حنیف، طارق نسیم، جابر عباسی، محمد اکمل بیگ، محمد اسلام، راشد احمداور محمد صلاح الدین نے مختلف تجاویز پیش کیں۔اجلاس میں تمام ریٹائرڈ ملازمین نے اپنی احتجاجی تحریک کو تیز کرنے پر اتفاق کیا، اوریہ فیصلہ کیا گیا کہ تمام ریٹائرڈ ملازمین 10 دسمبر کو انسانی حقوق کے عالمی دن کے موقع پر کراچی پریس کلب پر2 بجے دن مظاہرہ کریں گے اور اقوم متحدہ کی انسانی حقوق کی تنظیم اور انٹرنیشنل لیبر آرگنائزیشن میں یاداشت پیش کی جائیں گی۔