: تازہ ترین

تازہ ترین ویڈیو

آج کے ذہین طلبا وطالبات کل کے سائنسدان، صنعتکار اور قوم کے رہنما ہونگے، چیئرمین بلدیہ وسطی ریحان ہاشمی


Pic final February 16, 2020 | 8:11 PM

کراچی: (نیوزآن لائن) آج کے ذہین طلبا وطالبات کل کے سائنسدان، صنعتکار اور قوم کے رہنما ہونگے، تعلیمی اداروں میں مثبت ہم نصابی سرگرمیاں طلبا و طالبات کی صلاحیتوں کو نکھارتی ہیں۔طلباقوم کی امیدوں کا محور ہیں، طالبات کی تعلیم اور تربیت کے بغیر کوئی قوم حقیقت میں ترقی نہیں کرسکتی۔اِن خیالات کا اظہار چیئرمین بلدیہ وسطی ریحان ہاشمی نے چیئر مین میٹرک بورڈ ڈاکٹر سعید الدین کے ہمراہ بلدیہ وسطی کے زیر انتظام چلنے والے سر آغا خان انگلش میڈیم سکینڈری اسکول فیڈرل بی ایریا میں منعقدہ سائنسی نمائش کا معائنہ کرتے ہوئے طلباو طالبات و اساتذہ سے گفتگو کرتے ہوئے کیا۔اس موقع پر انکے ہمراہ ڈائریکٹر ایجوکیشن محمد اسلم خان ،ڈپٹی ڈائریکٹر ایجوکیشن گلبرک خد یجہ تسلیم ،سر آغا خان اسکول کی ہیڈ مسٹریس فرحین ناصر،ڈھکا گروپ کے ہیڈ حسنین رضوی، چیئر مین یوتھ افیئر کمیٹی سید عمار عباس بھی موجو دتھے ۔چیئر مین ریحان ہاشمی نے کہا کہ بلدیہ ضلع وسطی کے زیر انتظام چلنے والے اسکولوں کا تعلیمی معیار دیگر اسکولوں کی نسبت بہت بہتر ہوا ہے ۔انہوں نے کہا کہ انگلش میڈیم اسکولوں میں اب تک تقریباً 9سے 10ہزار رجسٹریشن ہو چکی ہے انہوں نے مزید کہا کہ نئی نسل کو جدید دور کے مطابق تعلیم اور تربیت مہیا سے آراستہ کرنے کا مطلب انہیں نئے دور اور ترقی یافتہ قوموں سے قدم ملاکرچلنے کے قابل بنانا ہے۔ انہوں نے کہا کہ بلدیہ وسطی تعلیمی اداروں میں بہتری کی خواہاں ہے۔ قبل ازیں چیئر مین میٹرک بورڈ سعید الدین نے استقبالیہ تقریر میں نمائش کے انعقاد کے اغراض و مقاصد سے مہمانوں کو آگاہ کرتے ہوئے کہا کہ نمائش کا مقصد طلبا وطالبات کی پوشیدہ صلاحیتوں کو اجاگرکرنے کے ساتھ ساتھ انہیں تعلیم سے بھرپور فائدہ اْٹھاتے ہوئے اپنے ٹیلنٹ کے اظہار کا موقع فراہم کرناہے،انہوں نے طلبا و طالبات کی کارکردگی کو سراہاتے ہوئے میٹرک بورڈ کی طرف سے سرٹیفیکٹ دینے کا اعلان بھی کیا اور نمائش میں لگائے گئے اسٹالز کا معائنہ کیا اورطلباو طالبات کو انکی صلاحیتوں پر خراجِ تحسین پیش کیا۔نمائش میں ماحولیات سے متعلق فزکس، کیمسٹری اور بائیولوجی کے مختلف شعبوں کے اسٹالز لگائے گئے تھے۔ نمائش دیکھنے والوں نے طلباو طالبات کی کاوشوں اور صلاحیتوں کو بھرپور خراجِ تحسین پیش کیا۔